Task Force Sampaguita Pinatibay ang Reach-Out Operations sa QC

 

QUEZON CITY, September 25, 2026 — Mas pinatibay ng Task Force Sampaguita ang koordinasyon at kahandaan nito sa pagtugon sa mga Individuals in Street Situation (ISS), Children in Street Situation (CISS), at Families in Street Situation (FISS) sa pamamagitan ng tatlong araw na Operational Planning na ginanap noong Setyembre 23–25 sa The Tribute Hotel.

Nakatuon ang planning activity sa pagbuo ng mas organisado, rights-based, child-sensitive, at family-centered na approach sa mga reach-out operations, kabilang ang pagkilala at paggalang sa kultura at kalagayan ng mga katutubo.

Nakiisa sa programa ang mga resource speaker mula sa DSWD Pag-Abot Program, Social Services Development Department (SSDD), Commission on Human Rights (CHR), Council for the Welfare of Children (CWC), National Commission on Indigenous Peoples (NCIP), at Bahay Tuluyan Foundation Inc.

Tinalakay ang mga pangunahing usapin kaugnay ng ISS, CISS, at FISS bilang rights holders, gayundin ang Salubungan Framework ng PESO bilang bahagi ng mas koordinadong pagtugon at pag-uugnay ng mga serbisyo.

Bilang konkretong hakbang, nagsagawa rin ng workshop para sa pagbuo ng Action Plan at pag-update ng mga identified hotspot areas sa iba't ibang distrito ng Quezon City.

Sa pamamagitan ng mas sistematikong pagpaplano at mas matibay na inter-agency coordination, layunin ng Task Force Sampaguita na maging mas mabilis, angkop, at makatao ang pagtugon sa pangangailangan ng mga indibidwal, bata, at pamilyang nasa street situations.

Sa QC, ang reach-out ay hindi lamang paglapit—ito ay pag-abot ng serbisyo, proteksyon, at suporta na may respeto sa karapatan at dignidad ng bawat isa.